Ek Adhoori Chitthi..!!✉️

Aaj phir tere naam ek adhoori chitthi likh rahi hoon,
jise bhejne ki himmat aaj bhi nahi juta paayi hoon…

Sach kahun toh,
yeh chitthi tujhe bhejne ke liye nahi,
khud ko halka karne ke liye likh rahi hoon…

Kehne ko itna kuch hai,
par jab bhi likhne baithti hoon -
tere baare mein, humare baare mein,
toh shabd kam pad jaate hain…
aur khamoshiyan zyada bolne lagti hain..!

Kehne ko main ek lekhika hoon,
par humari hi kahani ke liye lafz nahi milte..!!
Tu hi bata -
kaise chand shabdon mein likh doon
woh saari baatein
jo kabhi keh hi nahi paayi???

Shayad galti kisi ki nahi thi…
bas waqt thoda sa kam tha,
aur hum dono thode se chup..!!

Shayad tujhe sab yaad ho,
Shayad na bhi ho…
par mujhe -
aaj bhi har chhoti si baat yaad hai..!!!

Kaise shaamon ko saath baith
ghanton baatein kiya karte the,
kaise bina kahe bhi
sab samajh aa jaata tha..!

Kaise tu dheere se mera haath pakad leta tha,
aur main bina kuch kahe
us pal ko jee leti thi..

Humne kabhi is rishte ko naam nahi diya,
par shayad isi liye
yeh itna khaas bhi tha…
aur itna adhura bhi..!

Ab tu apni duniya mein hai,
main apni mein…
par kuch rishte alag hokar bhi
kahin khatam nahi hote..!!

Isiliye aaj bhi,
jab dil thoda bhar aata hai,
main ek aur chitthi likh deti hoon…

Aur un sab adhoori chitthiyon ke saath
isse bhi rakh deti hoon -
jaise kuch baatein
sirf mehsoos karne ke liye hoti hain,
kehne ke liye nahi..!!!

Kabhi kabhi lagta hai,
agar humne thoda aur kaha hota,
toh shayad kahani alag hoti…

Par phir sochti hoon-
shayad jo adhura reh jaata hai,
woh hi sabse zyada yaad rehta hai..!!

Isliye yeh chitthi bhi
baaki sab ki tarah adhoori rahegi…

Kyunki kuch rishton ko khatam nahi kiya jaata,
bas sabse chhupa kar, ek adhoori kahani ki tarah chhod diya jaata hai…!!!🥹❤️